გადამწვარი ხიდები - გზა ოცნებების სასაფლაოდან სინათლემდე

1. “მე ვარ საქართველო,
2. გამარჯვების მჯერა”.

საქართველოს ნაკრების ევროპის ჩემპიონატზე გასვლამ ქართველი გულშემატკივრების რაოდენობა საგრძნობლად გაზარდა. დღეს ამ სიტყვებს ვერცერთი ქართველი გულგრილად ვერ წაიკითხავს - ნაკრებმა თითოეულს განაცდევინა ის აღფრთოვანება და სიამაყე, რასაც გამარჯვებისკენ მიმავალ გზაზე ვგრძნობდით. ნაკრების წარმატებამ ფეხბურთი მრავალი ადამიანის ყოველდღიურობის ნაწილად აქცია, გააძლიერა ერთიანობისა და სიხარულის განცდა.

მაგრამ იკითხავთ, რა შუაშია ეს ყველაფერი ნათია ჯაგოდნიშვილის ბესტსელერ წიგნთან?

"გადამწვარი ხიდები" ბევრ მნიშვნელოვან თემასთან ერთად, გაჯერებულია ფეხბურთზე შეყვარებული პერსონაჟებით. პროტაგონისტი, გეგა ცეცხლაძე, წარმატებული ფეხბურთელია, რომლის ცხოვრება ერთ საბედისწერო დღეს იცვლება. თუმცა, ეროვნული ნაკრების მაისურის დათმობის შემდეგაც კი, მისი ფეხბურთისადმი სიყვარული არ ნელდება, პირიქით - მთელი არსებით უფრო და უფრო უახლოვდება მას.

საინტერესოა გეგას მორალური კომპასიც, რომელიც კარნახობს, რომ საკუთარი კარიერა რუსეთში არ უნდა გააგრძელოს, მიუხედავად იმისა, თუ რას ეუბნებიან ოჯახის წევრები. წიგნის ამ მონაკვეთებში კარგად ჩანს, თუ რა დამოკიდებულება აქვთ ახალგაზრდებს რუსეთისადმი, რაც კიდევ ერთ აქტუალურ თემას გამოკვეთს.

"არაფერი ყოფილა ისეთი მწარე, როგორიც ოცნებების სასაფლაოზე მოხვედრა"

ოცნებების სასაფლაოზე გეგა მრავალი მიზეზით ხვდება. მას დაუპირისპირდნენ ადამიანები, რომლებიც მზად არიან, თავიანთი ინტერესების გამო სხვები გაწირონ. ცრუ ბრალდებები, კორუფცია და ოჯახის წევრების უნდობლობა გეგას ცხოვრების მუდმივი თანამგზავრია. მიუხედავად ამ ყველაფრისა, გეგა არ ნებდება.

მან კარგად იცის, რომ მის გარშემო არსებული ბნელი და რთული რეალობა შეიძლება ცხოვრების მთავარ გამოცდად იქცეს, მაგრამ მაინც ამაყად დგას. მისი ბრძოლა არა მხოლოდ გარეგანი მტრის წინააღმდეგაა, არამედ შინაგანი წინააღმდეგობების დაძლევასაც გულისხმობს - საკუთარი შიშები, ტკივილი და სიძნელეები, რომლებიც წინ ეღობება.

"გადამწვარი ხიდები" მოგვითხრობს გეგას და ანას სიყვარულის ისტორიასაც, რომელიც თითქოს უხილავი ძაფებითაა დაკავშირებული იმ საბედისწერო დღესთან, რომელმაც ორივეს ცხოვრება შეცვალა. მათი ისტორია ტკივილითაა სავსე, თუმცა მათი ძლიერი სიყვარული საბოლოოდ ყველაფერს ჩრდილავს.

წიგნში ასევე განხილულია ისეთი თემები, როგორიცაა საყვარელი ადამიანის დაკარგვა, ურთიერთობები მშობლებთან, პოლიტიკა, ბავშვობის მეგობრები და იმედი, რომელსაც მათი არსებობით განვიცდით.

თუ აქამდეც წაგიკითხავთ “გადამწვარი ხიდები” და სურვილი გაგჩენიათ, რომ იმ საბედისწერო დღეზე მეტი გაგეგოთ, პალიტრა L-ის მიერ გამოცემულ ლიმიტირებულ ვერსიაში ბონუს ეპიზოდი გელოდებათ. ახლა უკვე შეგიძლიათ, იცოდეთ იმაზე მეტი, ვიდრე აქამდე. ბონუს ეპიზოდი მკითხველს შესაძლებლობას აძლევს, კიდევ უფრო ღრმად ჩაეფლოს ამ ტრაგიკული ისტორიის ემოციებში და პერსონაჟთა შინაგან სამყაროში. „გადამწვარი ხიდების“ მოყვარულთათვის  ეს ეპიზოდი ნამდვილი საჩუქარია!

და ბოლოს, "May the bridges I burn, light the way" - ეს ის სიტყვებია, რომელიც ლაიტმოტივად გასდევს მთელს წიგნს.

გეგა ცეცხლაძე მზადაა, დაწვას ყველა ხიდი და მიღებული სინათლით გააგრძელოს ცხოვრების გზა.